Mga Librong Paparating na Hindi ninyo Dapat Palampasin

Sa darating na Sabado, ika-10 ng Setyembre, ay gaganapin ang kauna-unahang WIT: Visprint’s First Annual Reader’s Day. Anong ibig sabihin noon? Ewan. Pero sabi sa kanilang Facebook event ay magkakaroon sila ng exhibit ng mga obra ng kanilang mga artists, behind-the-scene revelations mula sa mga may akda, pa-seminar tungkol sa pagsusulat ng libro, pasilip sa mga iba pang aabangan nating mga libro na makakapagpaubos ng mga inipon nating allowance at savings, at as usual katulad ng iba pang event, at marami pang ibang sorpresa.

At balita ko nga, kung hindi ako nagkakamali, doon ipapasilip ang ika-siyam na libro ni Bob Ong. Nakasali ka ba sa kanyang pakulo sa Facebook at Google+ nitong mga nagdaang linggo?

Kilala natin ang Visprint dahil sa pagbibigay sa atin ng mga libro ng ating mga idolo na sina Bob Ong at Eros Atalia, ng ubod ng asteeg na Kikomachine Komix ni Manix Abrera, ang anthology tungkol sa Eraserheads na Tikman ang Langit, at marami pang iba.

Lubos akong nagagalak dahil sa pamamagitan ng mga ganitong klaseng pagtitipon, muling nabubuhay ang hilig ng bagong henerasyon sa pagbabasa ng libro.

Pero bukod sa mga libro sa roster ng Visprint, na inaamin kong totoong nakakaubos ng aking ipon, mayroon pang ibang mga libro akong inaabangan bago magtapos ang taon na tiyak na ibabawas ko sa aking Christmas budget.

At narito sila, hayaan mong magbigay ako ng ilang kuwento tungkol sa kanila.

[caption id="attachment_292" align="alignnone" width="500" caption="Anong sinabi ng Philippine Volcanoes at Azkals sa katawan ni Tado?"][/caption]

• LIBRO NI TADO- Wala pang eksaktong pamagat pero hitsura pa lang, alam mong nakamamatay na ang ka-astigan. Matagal na akong fan ni Tado. Tagapakinig ako ng show nila ni Ramon Bautista at Angel Rivero na Brewrats simula pa lang noong day 1 nila sa radyo.

Noong mawala sila sa ere, inaamin kong na-miss ko si ang kanilang trio, especially si Tado lalo na ang kanyang bobonic English at ang mga malaman na banat. Kaya nang bumisita ako sa kanilang Facebook page (The Brewrats Republic), walang pagsidlan ang aking naging kaligayahan nang makita ko na magkakaroon ng libro si Tado mula sa PSICOM publishing.

Hinihintay ko ang pagkakataong muli kong makakakuwentuhan si Arvin Jimenez sa bawat pahina ng kanyang libro.

[caption id="attachment_293" align="alignnone" width="400" caption="It's like Harper Lee's 'To Kill a Mocking Bird' - but it's an Angry Bird."][/caption]

• TO KILL AN ANGRY BIRD (ARNEL AQUITANIA) - Kung matagal na kayong nagbabasa ng aking blog, malamang ay nabasa niyo na yung naging book review ko noong isang taon tungkol sa librong Angels and Jejemons ni Arnel Aquitania, isang aklat tungkol sa Pinoy Pop Culture.

Katulad ng nasa teaser photo, tungkol din ito sa Pinoy Pop Culture ngunit mas malawak ang magiging saklaw at mas wasak ang humor - daw.

Lubos ang paghanga at pasasalamat ko sa PSICOM Publishing sa pagbibigay ng oportunidad sa ibang mga Pilipinong manunulat upang ang kanilang mga obra ay mabasa.

[caption id="attachment_294" align="alignnone" width="500" caption="Sa wakas Ricky Lee! Sa wakas!"][/caption]

• ASWANG (RICKY LEE) - Kung kayo ay nakapagbasa noong makapunit-lacrimal gland na nobela ni Ricky Lee na Para Kay B, nandoon sa likod na bahagi ang patikim tungkol sa kanyang susunod na nobela - angAswang, isang political satire tungkol sa isang baklang impersonator na nagiging manananggal.

Makailang ulit ko nang natapos basahin ang Para Kay B sa sobrang inip sa paglabas ng ikalawang nobela ng premyadong manunulat na si Ricky Lee. Huwag nang mangamaba. Sa darating na ika-27 ng Nobyembre, sa Skydome, SM City North EDSA, ilalabas ang Aswang.

Handa ka na bang makipag-wrestling kay Amapola? Para sa iba pang detalye tungkol sa librong ito, mangyari lamang na “i-like” ang pahinang ito sa Facebook,

______

Marami sa atin ang nahuhumaling sa pagbabasa ng libro ng mga banyaga tungkol sa mga wizard at witches, vampires, pakikipagsapalaran, giyera, kasaysayan, pag-ibig, at iba pa. Mabuti naman kung sa ganoon. Pero huwag sana nating isantabi at balewalain ang libro ng ating mga kababayan.

Kahit pa ang mga ito, ika nga ni kumpareng Soriano, ay nakasulat sa language of the streets and not of the learned.

Hindi ako sociologist at dalubhasa pero sa tingin ko, makakatulong sa pagkakaroon ng identity nating mga Noypi ang pagbabasa ng libro na nakasulat sa sarili nating wika, at sa mas mahaba pang patutunguhan, magiging susi ito sa ating kaunlaran.

Inaanyayahan kita ngayon na bumili at magbasa ng mga libro ng ating mga kababayan (Pare, wala kang mada-download na eBook ng mga yan). Suportahan natin ang lahat ng mga Pilipinong may hawak ng panulat!

Handa ka na bang magbasa?

Angels and Jejemons: Isang Pagsusuri (o Isang Mapagkunwaring Book Review)

[caption id="" align="alignnone" width="500" caption="Cover pa lang. Catchy na. Sino ba naman ang hindi magiging interesado sa librong yan? Pero dapat pala, pinaniwalaan ko yung "Do not judge a book by its cover""][/caption]

Isang disclaimer: Hindi ito libro tungkol sa mga anghel. Hindi din ito tungkol sa mga Jejemon. At hindi ito spoof ng nobela ni Dan Brown kaya’t hindi mo makikita ang Santo Papa na nagsusuot ng jejecap bilang kapalit ng kanyang Mitra.

Isa itong aklat tungkol sa Pinoy Pop Culture.

Nasa Booksale ako kahapon sa SM CIty Calamba nang makapukaw ito sa aming paningin. Itinuro sa akin ng tatay ko ang librong ito na naka-display malapit sa may counter. Takaw-pansin ang libro dahil katulad ng illustration ng sikat na nobela ni Dan Brown - ang Angels and Demons.

[caption id="" align="alignnone" width="295" caption="Binasa ko 'to noong College sa kalagitnaan ng pagre-review ko sa Ontology at Epistemology. Hindi ko mabitawan sa sobrang ganda! #DanBrownIsEvil"][/caption]

Dahil mura ang aklat sa halagang 85 pesos, agad ko itong binayaran sa counter. At hindi naman ako nanghinayanhg sa pagbili. Puwede ng pagtiyagaan.

Madali kong natapos ang aklat. 136 pahina lang kasi. Isang upuan lang, solb na ang kuwentuhan.

Ang aklat, katulad ng nabanggit ko sa itaas, ay tungkol sa Pinoy Pop Culture. Nahahati ito sa ilang mga kabanata: mga patunkol sa pelikula, teleserye, artista, listahan ng mga kung-ano-mang-naisip-ng-may-akda, musika, basketball, at ilan pang mga random na bagay na pumasok sa isip ni Arnel Aquitania na isinulat upang maging bahagi ng aklat.

Dahil nga patungkol sa Pinoy Pop Culture, makaka-relate ang mga mambabasa sa ilang mga bagay sa aklat na ito. Pero may mga item sa libro na kailangan pang i-Google ng kasalukuyang henerasyon dahil sa masyao na itong vintage o hindi na umabot sa panahon ng torrents. Kaya may mga parte na nagpapatawa na pala ang may akda, hindi ko pa rin ma-gets.

Taglish at informal ang wikang ginamit sa aklat. Parang nagku-kuwentuhan lang kayo ng conyologs mong kaibigan. Nandoon ang witty na atake at paglalaro sa mga salitang ginamit.

Kung alipin ka ni Bob Ong, malamang na sabihin mong “parang si Bob Ong ang istilo ng pagsusulat.” Ngayon pa lang itigil mo na ang pagbabasa ng artikulong ito at pumunta sa pinakamalapit na bookstore at pumunta sa Filipiniana section, halungkatin mo yung mga obra ng ibang Pilipinong manunulat.

Sa kabuuan, mahusay ang pagkakasulat ni Arnel Aquitania sa aklat na ito. Nandoon ang sarili niyang istilo sa pagku-kuwento na hindi maaaring ihalintulad sa ibang manunulat.

Pinupuri ko din ang PSICOM Publishing sa pagbibigay ng pagkakataon sa ilan nating mga kababayang manunulat na mailimbag sa isang aklat ang kanilang mga obra. At naniniwala akong madami pa kayong matutulungan. At sana ay isa na po ako doon (shameless promotion).

Sa bandang huli, nais kong iwanan sa inyo ang katagang ito: “Bob Ong may have stereotyped the writing style of some Pinoy writers but only a wide reader can break that notion.” (Pinag-isipan ko yan. Bawal nakawin.)

Diyan na muna kayo. Baka kuyugin na ako ng mga fans ni Bob Ong. Padayon!

Originally written and posted on 8 November 2010. Reposting because I am bored. And too burned out to write something new.